ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត សម្រេចអនុញ្ញាតឱ្យក្រុមហ៊ុនឯកជនអាចប្រើប្រាស់អាគារគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីបំប៉នសមត្ថភាពជំនាញ បង្កើនជំនាញ ឬផ្លាស់ប្ដូរជំនាញដល់កម្មករនិយោជិតរបស់ខ្លួន។

ថ្លែងក្នុងវេទិការដ្ឋាភិបាល និងវិស័យឯកជនលើកទី១៩ នៅវិមានសន្ដិភាព ព្រឹកថ្ងៃច័ន្ទ ទី១៣ ខែវិច្ឆិកា ឆ្នាំ២០២៣ នេះ សម្ដេចធិបតី ហ៊ុន ម៉ាណែត បានបញ្ជាក់ថា ការធ្វើបែបនេះគឺដើម្បីជំរុញកំណើនផលិតភាពការងារ និងគាំទ្រដល់ការធ្វើទំនើបកម្មខ្សែច្រវ៉ាក់ផលិតកម្ម ឬការផ្ដល់សេវាកម្មរបស់រោងចក្រ-សហគ្រាស។

ជាមួយគ្នានេះសម្ដេចធិបតីបានជំរុញដល់ក្រសួងការងារត្រូវជំរុញការអភិវឌ្ឍជំនាញ និងផលិតភាពរបស់កម្មករ និងបង្កើតឱ្យមានកម្មវិធីបណ្ដុះបណ្ដាលវេនយប់ ឬចុងសប្ដាហ៍ផងដែរ៕